авиация қаруы

(Авиационные вооружения)

әскери ұшақтарға және басқа ұшатын аппараттарға қондырылатын, қарсылас нысанасын жоятын қару мен оларды қозғалысқа келтіретін құрал-жабдықтар. А. қ-на ұшаққа орнатылатын қарулардың барлық түрлері, олардың қондырғылары, бомба тастайтын құрал мен атыс қаруының көздеуші жабдықтары, қару-жарақ жүйесінің борттағы есептеуіш тетіктері, оқ-дәрілер, арнаулы жүктерді орналастыратын және түсіретін құралдар, т.б. жатады. А.қ. ракета, зеңбірек, пулемет, бомбалаушы және арнаулы қару түрлеріне бөлінеді. Оған: а) зеңбірек-пулемет қаруына – калибрі 7,62 мм-ден 15 мм-ге дейінгі пулеметтер, 20 мм және одан да үл-кен калибрлі зеңбіректер, тиісті қондырғылар мен оқ-дәрілер; ә) бомбалаушы қаруға – түрлі мақсатта қолданылатын авиациялық бомбалар, торпедалар, миналар, оларды көтеретін және тастайтын құралдар кіреді; б) ракета қаруына — басқарылатын және басқарылмайтын ракеталар, осы заманғы ұшақтардың негізгі қаруы жатады. Басқарылатын снарядтар мен осы заманғы А.қ. — механикалық, радиотехникалық, электрондық, оптикалық аспаптар мен тетіктердің күрделі жиынтығы.